|
Akordioa lortu dute
Nafarroako suhiltzaileek eta partzuergoak
Lan hitzarmena lau
urtekoa da eta %7ko soldata igoera izanen dute
Berria, 2004ko
ekainaren 5a.
Hamar orduko negoziaketen ondoren, Nafarroako suhiltzaileen ordezkari
sindikalek eta patzuergoko zuzendaritzak akordioa lortu zuten atzo
goizaldean. Hitzartutako lan hitzarmena lau urtekoa da, eta denbora horretan
%7ko soldata igoera izanen dute suhiltzaileek.
Goizaldeko 04:00etan sindikatu guztiek sinatutako akordioa langileen
batzarrak onetsi zuen atzo goizean. Beraz, hasi behar zuten gose greba
bertan behera gelditu zen, eta lanari ekin zioten. Akordioaren arabera,
lehen bi urteetan, 2004 eta 2005 urteetan, soldata igoera %2,5ekoa izanen
da. Hurrengo bi urteetan, berriz, igoera %1koa izanen da baina
produktibitateari uztarturik. Orotara lau urtean %7 igoko zaie soldata.
Halaber, akordioak babes klausula bat jaso du, suhiltzaileak Administrazioko
mahai orokorreko soldata igoeretan egonen direla zehazten duena. Baina
baldintza batzuekin onartuko da hori. Lehenengo bi urteetan Administrazioko
mahai orokorreko soldata igoeretan sartuko lirateke, baldin eta neurriak
langileen %80an baldin badu eragina. Hurrengo bi urteetan berriz, langileen
%51 baino gehiagorengan eragingo du.Mahai orokorreko soldata igoeran
sartzeko eskaera zen suhiltzaileen aldarrikapenetako bat eta ekintzak
gogortu egin zituzten mahai orokorreko %3ko soldata igoeratik at utzi
zituztela jakin zutenean. Horretaz gain, Gobernuak onartu du formakuntzan
eta segurtasunean lan gehiago egitea. Urtean 40 orduko trebakuntza eskainiko
zaie suhiltzaileei, orain arte 30 ordu bakarrik zituztenean. Halaber,
Gobernuak hiruhilero suhiltzaileen ibilgailuak eta tresneria ikuskatuko ditu
segurtasuna bermatzeko. Alta, suhiltzaileek ez dute Gizarte Segurantzak
eskaintzen duen jubilazio handiena jasoko, eta dituzten bizitza eta istripu
aseguroak hobetzeari uko egin diote. Suhiltzaileek urtean 23.800 euro eta
32.600 euro arteko soldata dute, eta 59 egun lan egiten dituzte 24 orduko
lanaldiekin.Bi aldeak pozik, Javier Caballero Barne sailburuak grebak ez
zuela «izateko arrazoirik» esan zuen.
VOLVER |
