|
Zerbitzuaren «heriotza»
antzeztu dute Nafarroako suhiltzaileek
Berria, 2004ko
maiatzaren 18a.
Sindikatuak, hamabost
eguneko lanuzte partzialak egin eta gero, gaur bilduko dira Barne Saileko
zuzendaritzarekin: asteon akordiorik lortuko ez balute protestak gogortu
eginen dituztela iragarri dute.
Berrehunen bat suhiltzailek partzuergoko zerbitzuaren «heriotza» antzeztu
zuten atzo Nafarroako Gobernuaren egoitzaren aurrean. Iragan astean
hautsitako negoziazioak, gaur hasiko dituzte berriro sindikatuek eta Barne
Sailak. Asteon lan hitzarmenean akordiorik lortzen ez badute, protesta
neurriak gogortu eginen dituztela iragarri zuten langileen ordezkariek.
Suhiltzaileak Carlos III Etorbidean barrena desfilatzen iritsi ziren
Nafarroako Jauregira. Desfilearen lehen lerroan hilkutxa zekarren laukotea,
zerraldoaren gainean partzuergoaren uniformea eta kaskoa zituzten kokatuta.
Atzetik, segizioari erritmoa markatzen hileta martxa jotzen zuen musika
banda. Gobernuaren egoitza atarira iritsi zirenean, hilkutxa atea aurreko
lurrean kokatu zuten eta, zerraldoa inguratzen zutela, zeramatzaten kaskoak
utzi zituzten. Ondoren, banan bana, Gobernuko erregistrora sartu ziren
prestakuntzarik ez duten lanetan aritzen direla esaten duen salaketa idatzia
erregistroan uzteko.
Eskaintza serioa nahi dute
Victor Moreno, suhiltzaileen partzuergoko bozeramaleak gorpuaren egoera ez
dela ona azpimarratu zuen. «Hainbat ikerketak esaten dute suhiltzaileen
partzuergoko osasuna ez dela ona. Urteak daramatzagu arazo berak pilatzen.
Asteon suhiltzaileen zerbitzu serio baten oinarriak ezartzen dituen
eskaintza ez badago, zerbitzuaren heriotza izanen da», ohartarazi zuen.
Zerbitzua suhiltzaileen borondateagatik mantendu dela esan zuen Rubiok, eta
egungo lan baldintzetan ez daudela lan egiten jarraitzeko prest adierazi
zuen. «Suhiltzaileek bakarrik tiratzen dugu zerbitzutik, baina ez dugu
tiratzen jarraituko bigarren mailako funtzionarioak bezala hartzen gaituzten
bitartean», kritikatu zuen. Iragan astean etendako negoziazioei berriro
ekingo diete gaur. Hitzordua 09:00etan dute Gobernuaren egoitzan Jose Ramon
Rabade Barne saileko zuzendariarekin. Akordiorik ezean, protesta ekintzak
gogortu eginen dituztela iragarri dute. Maiatzaren 3tik egunero lau orduko
lanuzteak egin dituzte suhiltzaileak lan hitzarmen «duina» eskatzeko.
Nafarroan dauden 400 suhiltzaile inguruk lan baldintza hobeak eta
trebakuntza gehiago eskatzen dituzte. Langile batzordeak iaz lortutako
akordioa betetzeko eskatu dio Gobernuari. Akordio horren arabera,
suhiltzaileei %18ko soldata igoera dagokie. Halaber, partzuergoak prestatuta
ez dagoen zerbitzuetan ari behar duela salatu dute sindikatuek. «Trebakuntza
falta da. Prestatuta ez gauden lanetan jartzen gaituzte», gogoratu zuen
Rubiok atzo.
VOLVER |
