|
Suhiltzaileek itxialdia hasi dute Iruñeko parkean
Foralak indarrez sartu ziren eguerdian Aralar kaleko egoitzan, eta
suhiltzaile bat zauritu zuten
Berria, 2004ko
ekainaren 1a
Nafarroako suhiltzaileak gaua Aralarko parkean itxita emateko prest ziren
atzo iluntzean, foralekin istiluak eta arratsalde tentsioz beterikoa izan
ondoren.
Lan
hitzarmen hobea eskatzeko hasitako protestaldian atzokoa izan zen egunik
gogorrena, batez ere foralak Aralarko egoitzara hurbildu eta bertan itxita
zeuden suhiltzaileak indarrez kaleratzen saiatu zirenean.
Eguerdian
izan zen. Foralak itxialdia egiten ari ziren 200 suhiltzaileen aurka oldartu
ziren eta grebalarietako bat borrekin jo eta zauritu egin zuten.
Suhiltzaileek, foruzainen jokabidea ikusirik, ur mangerak erabili zituzten,
eta berrogeita hamar bat lagun teilatura igo ziren. Arratsaldean joan ziren
foralak handik, baina suhiltzaileek itxialdiarekin aurrera jarraitzeko
erabakia hartu zen biltzarrean. Bide batez, foruzainen eta, oro har,
Nafarroako Gobernuaren jarrera gogor kritikatu zuten.Suhiltzaileek hiru aste
daramatzate lan hitzarmen hobea eskatzeko protestan. Joan den astean
ekintzak gogortuko zituztela iragarri zuten eta Aralarko parkean itxialdia
egitea erabaki zuten atzo.
IRITZIA
Suhiltzaileen aurkako neurrigabeko indarkeria
Nafarroako Foruzaingoak bertoko suhiltzaile
grebalarien aurka atzo erakutsi zuen jarrerak lan gatazka gogortzea eta
harremanak okertzea baino ez zuen lortu, neurrigabeko oldarraldia baino ez
baitzen izan, eta langile bat ospitaleratu behar izatea eragin baitzuen.
Duela hiru aste hasi zuten greba suhiltzaileek, lan baldintzak hobetze
aldera Nafarroako Gobernua presionatzeko. Soldatak igotzeko eta
suhiltzaileen prestaketak hobetzeko eskatzen dute. Itunik lortzen ez
zutela-eta langileen eskubide, eta presiobide azkena, dena egitea deliberatu
zuten.
Foralek, berriz,
indarrez zapaldu nahi izan diete eskubide hori.
VOLVER |
